1 Iwe, Tafit a aüetä imwan kewe lon ewe telinimwen Tafit. A pwal amolätä eu leni fän iten an Kot we pworofel o aüetä eu imw mangaku fän itan. 2 Mürin, Tafit a apasa, “Esap wor eman epwe tongeni mwärei än Kot we pworofel, pwe ekewe chök mwän seni ewe ainangen Lefi, pun ewe Samol mi Lapalap a filiretä, pwe repwe mwärei an pworofel o angang ngeni tori feilfeilachök.” ✡ Tut 10.8 3 Iwe, Tafit a amwichafengeni ekewe chon Israel meinisin me lon Jerusalem, pwe repwe uwato än ewe Samol mi Lapalap we pworofel ngeni ewe leni Tafit a fen amolätä. 4 Iwe, Tafit a pwal achufengeni ekewe mwirimwirin Aaron me ekewe mwän seni ewe ainangen Lefi: 5 Seni än Kohat we cho Uriel ewe samol fiti ipükü rüe märärin kewe. 6 Seni än Merari we cho Asaia ewe samol fiti rüepükü rüe märärin kewe. 7 Seni än Kersom we cho Joel ewe samol fiti ipükü ilik märärin kewe. 8 Seni än Elisafan we cho Semaia ewe samol fiti rüepükü märärin kewe. 9 Seni än Hepron we cho Eliel ewe samol fiti walik märärin kewe. 10 Seni än Usiel we cho Aminatap ewe samol fiti ipükü engol me ruoman märärin kewe. 11 Mürin, Tafit a körifengeni ekewe souasor Satok me Apiatar, pwal wonoman mwän seni ewe ainangen Lefi: Uriel, Asaia, Joel, Semaia, Eliel me Aminatap. 12 Iwe, a üreniir, “Ämi mwänirelan än semelapemi kewe cho seni ewe ainangen Lefi, oupwe apinikemi, ämi me pwimi, pwe oupwe uwato ewe pworofel än ewe Samol mi Lapalap ewe Koten Israel lon ewe leni üa amolätä fän itan. 13 Pokiten ämi ousap mwärei ewe pworofel lon ewe aeuin fansoun, ewe Samol mi Lapalap ach we Kot a afeiengauakich, pun sisap aisini Kot usun mine sipwe föri ngeni.” 14 Iei mine ekewe souasor me ekewe mwän seni ewe ainangen Lefi ra apiniir, pwe repwe uwato ewe pworofel än ewe Samol mi Lapalap ewe Koten Israel. 15 Iwe, ekewe mwän seni ewe ainangen Lefi ra mwärei än Kot we pworofel won afarer fän ekewe ämwär, usun Moses a fen allük fän alon ewe Samol mi Lapalap. ✡ Eks 25.14

16 Iwe, Tafit a pwal allük ngeni ekewe samolun chon ewe ainangen Lefi, pwe repwe filätä chon köl me lein pwiir kana, pwe repwe köl o ettiki sokopaten pisekin ettik fän pwapwa, repwe ettik kitar me ükülele o aea pisekin kaktai. 17 Iei mine ra filätä Heman nöün Joel we mwän me märärin we Asaf nöün Perekia we mwän, pwal märärir we Etan nöün Kusaia we mwän seni än Merari we cho. 18 Iwe, ikkei ir märärin kewe lon aruuen tettel mi etiir: Sekaria, Jasiel, Semiramot, Jehiel, Uni, Eliap, Penaia, Maseia, Matitia, Elifelehu me Mikneia, pwal ekewe chon mamasa asamalapen imwenfel Opet-etom me Jeiel. 19 Nge ekewe souköl Heman, Asaf me Etan ra wisen aea pisekin kaktai seni piras. 20 Sekaria, Asiel, Semiramot, Jehiel, Uni, Eliap, Maseia me Penaia ra wisen ettik ükülele lon ngingin Alamot * wewen Alamot eli sopran. 21 Nge Matitia, Elifelehu, Mikneia, Opet-etom, Jeiel me Asasia ra wisen emwen fän kitar lon ngingin Seminit † wewen Seminit eli paas. 22 Iwe, Chenania i eman souköl, iei mine a fil pwe epwe emweni ewe mwichen köl seni ewe ainangen Lefi. 23 Perekia me Elkana ra fil pwe repwe mamasa asamalapen lenien ewe pworofel. 24 Ekewe souasor Sepania, Josafat, Netanel, Amasai, Sekaria, Penaia me Elieser ra fil pwe repwe ettiki ekewe rappwa me mwen än Kot we pworofel. Nge Opet-etom me Jehia ra pwal fil pwe repwe mamasa asamalapen lenien ewe pworofel.

25 Iwe, Tafit me ekewe souakomwen chon Israel, pwal ekewe chon nemenemen mwichen sounfiu ra feila pwe repwe uwato än ewe Samol mi Lapalap we pworofel seni imwen Opet-etom fän mweireiren pwapwa. 26 Pokiten Kot a alisi ekewe mwän seni ewe ainangen Lefi mi mwärei än ewe Samol mi Lapalap we pworofel, ra eäni asor füman ätemwänin kow me füman ätemwänin sip. 27 Iwe, Tafit a üföüf echö üf mi pwechepwech, usun chök ekewe mwän seni ewe ainangen Lefi meinisin mi mwärei ewe pworofel, pwal ekewe chon köl me Chenania ewe souemwenin ewe mwichen köl. Tafit a pwal üföüf echö üf itan efot. 28 Iei usun chon Israel meinisin ra uwato än ewe Samol mi Lapalap we pworofel fän mweireiren pwapwa, fän tikin sokopaten rappwa, fän kaktai, pwal fän tikin kitar me ükülele.

29 Nge lupwen ra mwärelong än ewe Samol mi Lapalap we pworofel lon Jerusalem, Mikal nöün Saul we fefin a newu seni ewe asammwacho o küna ewe king Tafit, pwe a pworuk o mwetemwet fän pwapwa. Iwe, a turunufasei Tafit lon lelukan.