1 Iwe, Satan a ü ngeni chon Israel o pesei ngeni Tafit pwe epwe angei iteiten chon Israel. 2 Iei mine Tafit a üreni Joap me ekewe meilapen mwichen sounfiu, “Oupwe feila o angei iteiten chon Israel seni Persepa tori Tan, mürin oupwe asileto rei pwe üpwe silei iteiter.” 3 Nge Joap a üra, “Amwo ewe Samol mi Lapalap epwe awattela iteiten nöün aramas fän ipükü seni me mwan. Ai samol me ai king, ifa usun, sap ir meinisin noum chon angang? Pwota ka ekiekietä ei sokun? Pwota kopwe atoto tipis won Israel?” 4 Nge ewe king a pöchökül ngeni Joap, pwe a aleasochisi alon. Iei mine Joap a feila lemenen unusen Israel, mürin a liwiniti Jerusalem. 5 Iwe, Joap a ngeni Tafit unusen iteiten ekewe aramas. Lon unusen Israel a wor ükükün eu million ipüküngeröü mwän mi sile maun fän ketilas, nge lon Juta mi wor ükükün föpükü fik ngeröü mwän mi sile maun fän ketilas. 6 Nge Joap esap alealong lon ewe iteit chon ewe ainangen Lefi me Peniamin, pun a fokun oput än ewe king allük.

7 Nge Kot esap tipeeu ngeni ei lapalap, iei mine a apwüngü chon Israel. 8 Iwe, Tafit a üreni Kot, “Üa fokun tipis ren mine üa föri. Nge iei üa tüngor ngonuk, kopwe amusa seniei ai tipis ngang noum chon angang. Pun ngang üa föri mine a fokun mwäl.” 9 Mürin, ewe Samol mi Lapalap a kapas ngeni Kat nöün Tafit we soufos, 10 “Kopwe feila o üreni Tafit pwe iei alon ewe Samol mi Lapalap: Ülüngat mettoch üa uwato reöm. Kopwe filätä eu me leir, pwe üpwe föri ngonuk.” 11 Iei mine Kat a feila ren Tafit o asile ngeni mine ewe Samol mi Lapalap a üreni. A apasa, “Iei kopwe filätä mine ka mochen: 12 Ika ka mochen pwe epwe fis lengita lon ükükün ülüngat ier? Ika ewe fanü epwe tala ren chon oputom lon ükükün ülüngat maram, lupwen chon oputom repwe akufuk fän nöür ketilas? Ika nöün ewe Samol mi Lapalap ketilas epwe kuuk, pwe epwe wor mätter lon ükükün ülüngat rän, lupwen nöün ewe Samol mi Lapalap we chon läng epwe niela aramas lemenen unusen ewe fanü Israel? Iei kopwe filätä pälüan, pwe üpwe liwinla o asile ngeni ewe mi tinieito.” 13 Mürin, Tafit a üreni Kat, “Ngang üa nom lon riaföü lapalap. Amwo ewe Samol mi Lapalap epwe apwüngüei, pun an ümöümöch a fokun lapalap, nge üsap mochen pwe aramas repwe apwüngüei.”

14 Iei mine ewe Samol mi Lapalap a tinato mätter won chon Israel, pwe ükükün fik ngeröü ra mäla. 15 Mürin a tinala eman chon läng Jerusalem, pwe epwe afeiengaua aramasan. Nge lupwen a amolätä pwe epwe afeiengaua, ewe Samol mi Lapalap a lamalamala pokiten ewe feiengau. Iwe, a üreni ewe chon läng, “Kopwe ükütiu. Kopwe eitietiu poum.” Nge nöün ewe Samol mi Lapalap we chon läng a ütä ren ewe lenien wichiwich umwun wiich än Arauna ewe re Jepus. 16 Iwe, Tafit a anetai mesan o küna nöün ewe Samol mi Lapalap we chon läng pwe a ütä lefilen fanüfan me läng, nge a amwöchü lepöün efoch ketilas mi itila won Jerusalem. Mürin, Tafit me ekewe souakom mi üföüf üf seni tuk ra chapetiu lepwül. 17 Iwe, Tafit a iotek, “Ai Kot, ifa usun, sap ngang ätewe mi allük pwe repwe angei iteiten ekewe aramas? Ngang ätewe mi tipis o föri mine a fokun ngau. Nge met ekei aramas ra föri? Üa tüngor ngonuk, ai Kot Samol mi Lapalap, pwe kopwe apwüngüei me chon leimwen semei. Nge kosap afeiengaua noum aramas ren ei mätter.”

18 Mürin, nöün ewe Samol mi Lapalap we chon läng a allük ngeni Kat pwe epwe üreni Tafit, pwe epwe feitä ren ewe lenien wichiwich umwun wiich än Arauna ewe re Jepus o senätä eu rongen asor ngeni ewe Samol mi Lapalap. 19 Iei mine Tafit a aleasochisi ekewe kapas Kat a üreni fän alon ewe Samol mi Lapalap o feila. 20 Iwe, Arauna me nöün kewe föman mwän ra wichiwich umwun wiich. Nge lupwen ra küna ewe chon läng, nöün kewe ra sü o op. 21 Nge lupwen Tafit a feito ren Arauna, Arauna a chimwetä o küna Tafit. Iwe, a towu seni ewe lenien wichiwich umwun wiich, a asamolu Tafit o chapetiu lepwül. 22 Iwe, Tafit a üreni Arauna, “Kopwe ngeniei om we lenien wichiwich umwun wiich, pwe üpwe senätä eu rongen asor ngeni ewe Samol mi Lapalap, pwe ewe mätter epwe ükütiu seni ekewe aramas. Kopwe amömö ngeniei won aükükün liwinin.” 23 Mürin, Arauna a üreni Tafit, “Kopwe chök angei. Ai samol me ai king, kopwe föri mine a öch me reöm. Nengeni, üpwe fangala ekei ätemwänin kow fän iten asoren kek, ekewe pisekin wichiwich umwun wiich fän iten amwüch, pwal ewe wiich fän iten asoren mongö. Üpwe ngonuk meinisin.” 24 Nge ewe king Tafit a üreni Arauna, “Apwi, ngang üpwe möni senuk won aükükün liwinin. Üsap mochen angei senuk och mine om pwe üpwe eäni asor ngeni ewe Samol mi Lapalap, üsap pwal mochen eäni asoren kek mine üsap möni.” 25 Iei mine Tafit a möni ngeni Arauna ükükün wonopükü föün moni kolt fän iten ewe lenien wichiwich umwun wiich. 26 Mürin, Tafit a senätä eu rongen asor ngeni ewe Samol mi Lapalap o eäni asoren kek me asoren kinamwe won. A pwal iotek ngeni ewe Samol mi Lapalap, nge i a pälüeni o tinätiu ekkei seni läng mi kenala ewe asor won ewe rongen asor. 27 Mürin, ewe Samol mi Lapalap a allük ngeni ewe chon läng, pwe epwe siksefälielong nöün ketilas lon tükütükün. Iwe, ewe chon läng a aleasochisi.

28 Lon ewe fansoun, lupwen Tafit a küna pwe ewe Samol mi Lapalap a pälüeni an tüngor me lon ewe lenien wichiwich umwun wiich än Arauna ewe re Jepus, a föri an kewe asor ikenan. 29 Pun lon ena fansoun än ewe Samol mi Lapalap imwenfel seni mangaku Moses a föri me lon ewe fanüapö, pwal ewe rongen asoren kek, a nom lon ewe lenien fel me lon Kipeon. 30 Nge Tafit esap tongeni feila ikenan pwe epwe churi Kot, pun a niuokusiti ewe ketilas nöün nöün ewe Samol mi Lapalap we chon läng.