1 Iwe, mürin ei pworaus, Apsalom a angei efoch woken fän itan me oris, pwal lime mwän repwe akakom mwan. 2 Apsalom a soun pwätä lesosorusich o ütä lükün alen asamalapen ewe telinimw. Nge are eman mwän a feito fän an weires pwe ewe king epwe eäni kapwüng won, Apsalom a kökköri o aisini, “Ka feito seni ia?” Nge lupwen ewe mwän a ürätä meni ainang a feito seni, 3 Apsalom a üreni, “Nengeni, om kewe tüngor ra mürina o pwüng, nge esap wor eman epwe alisuk seni pekin ewe king, lupwen ka pwärätä om kewe weires.” 4 Iwe, Apsalom a pwal apasa, “Amwo itä üpwe soukapwüng lon ei fanü. Mürin, iteiten eman me eman mi wor an kapwüng ika tüngor epwe feito rei, nge ngang üpwe apwüngü fän wenechar.” 5 Iwe, iteiten fansoun, lupwen eman aramas a kan ngeni Apsalom pwe epwe asamolu, Apsalom a aitiewu pöün o amwöchü, a pwal mitiri. 6 Iei usun Apsalom a föri ngeni chon Israel meinisin mi feito ren ewe king pwe epwe eäni kapwüngür. Ren ei, Apsalom a elliapa leluken ekewe chon Israel.

7 Iwe, mürin rüanü ier, Apsalom a üreni ewe king, “Kose mochen mwüt ngeniei ai üpwe feila Hepron pwe üpwe apwönüetä ai pwon üa eäni ngeni ewe Samol mi Lapalap. 8 Pun ngang noum we chon angang üa eäni eu pwon, lupwen üa nom Kesur lon Siria o apasa: Are ewe Samol mi Lapalap epwe wesewesen aliwinisefäliei ngeni Jerusalem, üpwe fel ngeni ewe Samol mi Lapalap lon Hepron. 9 Iwe, ewe king a üreni Apsalom, “Kopwe feila fän kinamwe.” Iei mine Apsalom a feila Hepron. 10 Mürin, Apsalom a tinala chon künö lemonomon lemenen ekewe ainangen Israel meinisin o üra, “Lon ewe otun oua rongorong tikin rappwa, oupwe leüömong le apasa: Apsalom a king lon Hepron!” 11 Iwe, rüepükü mwän seni Jerusalem mi kö ra eti Apsalom. Nge ra feila fän öchün letiper, pun resap silei och usun mine a akota. 12 Lupwen Apsalom a eäni an kewe asor, a pwal titi Ahitofel ewe re Kilo nöün Tafit we chon öüröür seni an telinimw. Iei usun ewe rawangau ngeni ewe king a fokun pöchökülela, nge ekewe aramas mi eti Apsalom ra chomongola.

13 Iwe, eman chon künö a feito ren Tafit o üreni, “Ekewe chon Israel ra pwon ngeni Apsalom, pwe repwe eti.” 14 Mürin, Tafit a üreni nöün kewe nöüwis meinisin mi nom ren lon Jerusalem, “Ousipwe feila o sü seni Apsalom, pun ika sisap, esap chüen wor alen ach sipwe sü seni. Oupwe müttir feila pwe esap torikäekich o afeiengauakich, esap pwal niela chon ei telinimw ren ketilas.” 15 Iwe, nöün ewe king kewe nöüwis ra üreni, “Äm noum chon angang aia molotä pwe aipwe föri meinisin mine en äm samol me äm king ka filätä.” 16 Iei mine ewe king a feila fiti chon leimwan meinisin, chilon chök ülüpwülüan kewe engol a likitiir pwe repwe tümwünü ewe imwen king. 17 Iwe, lupwen ewe king me ekewe aramas meinisin mi tapwela mürin ra towu seni ewe telinimw, ra kaüla ren ewe akamüchülan imw. 18 Iwe, nöün kewe meilap meinisin ra nom ünükün, nge ekewe chon Cheret me chon Pelet meinisin, pwal ekewe wonopükü chon Kit mi fen tapwela mürin seni Kat ra feila mwen ewe king.

19 Mürin, ewe king a üreni Itai ewe re Kit, “Pwota ke pwal etikem? Kopwe liwinla o nom ren ewe king mi fö, pun en eman chon ekis, pwal eman mi sä seni fanüom. 20 Ka chök kärän feito. Pwota üpwe peseek pwe kopwe etifeilikem ikenai. Nge püsin ngang üsap silei ia üpwe feila ie. Kopwe liwinla, nge chon fanüom kewe repwe etuk. Ewe Samol mi Lapalap epwe kirikiröch o allükülük ngonuk.” 21 Nge Itai a üreni ewe king, “Mwo manauen ewe Samol mi Lapalap, pwal mwo manauen ai samol me ai king, ekis meinisin ia en kopwe feila ie, pwal ngang noum chon angang üpwe feila ie, ese lifilifil ika fetal ngeni mäla ika fetal ngeni manau.” 22 Mürin, Tafit a üreni Itai, “Mi mürina, kopwe fitikem le feila.” Iei mine Itai ewe re Kit a feila fiti nöün aramas meinisin, pwal ekewe famili mi nom ren. 23 Iwe, chon ewe fanü meinisin ra leüömong le kechü, lupwen ekewe aramas meinisin ra feil seniir. Pwal ewe king fiti nöün kewe aramas meinisin ra feila pekilan ewe aüwa Kitron o feila ngeni ewe fanüapö.

24 Iwe, ewe souasor Satok a pwal nom fiti ekewe mwän seni ewe ainangen Lefi meinisin mi mwärei an Kot we pworofel. Ra püngüpüngütiu än Kot we pworofel ünükün Apiatar tori ekewe aramas meinisin ra feiliwu seni ewe telinimw. 25 Mürin, ewe king a kapas ngeni Satok, “Kopwe aliwinsefälielong än Kot we pworofel lon ewe telinimw. Are üa küna ümöümöch me ren ewe Samol mi Lapalap, i epwe aliwinsefälieto o mwüt ngeniei pwe üpwe künasefäli ewe pworofel me lenian. 26 Nge are Kot esap ümöümöch ngeniei, ngang üa molotä. Epwe chök föri ngeniei mine a mürina me ren.” 27 Iwe, ewe king a pwal üreni ewe souasor Satok, “Nengeni, oupwe liwiniti ewe telinimw fän kinamwe, ämi me Apiatar fiti Ahimas noum we mwän me Jonatan nöün Apiatar we mwän. 28 Nge ngang üpwe witiwit ren ekewe petepeeten ewe chanpupu Jortan mi tori ewe fanüapö, tori kopwe asileto pworaus rei.” 29 Iei mine Satok me Apiatar ra aliwinsefäliela Jerusalem än Kot we pworofel o nonom ikenan.

30 Iwe, Tafit a feitä won palen ewe chukun Olif nge kechü, esap ipweip sus, a pwal pwölü möküran asisilen an letipeta. Nge pwal ekewe aramas meinisin mi eti ra pwölü mökürer, ra feitä nge kechü. 31 Lupwen eman a asile ngeni Tafit pwe Ahitofel a nom lein chokewe mi fiti Apsalom lon an raw, Tafit a iotek, “Ai Samol mi Lapalap, üa tüngor ngonuk pwe kopwe sorei än Ahitofel öüröür pwe epwe fokun mwäl.”

32 Iwe, lupwen Tafit a tori won ungen ewe chuk ewe ia ra fel ngeni Kot ie, Husai chiechian we ewe re Ark a feito pwe epwe churi. Üfan a kam, nge won möküran a wor pwül. 33 Iwe, Tafit a üreni, “Are kopwe etiei, kopwe chök epetiei. 34 Nge are kopwe liwinsefäliti ewe telinimw o üreni Apsalom, ‘Ai king, ngang üpwe noum chon angang. Usun üa chon angang ngeni semom me lom, iei usun üpwe chon angang ngonuk,’ mürin ka tongeni alisiei ren om atai än Ahitofel öüröür. 35 Ekewe souasor Satok me Apiatar ra pwal nom reöm ikenan. Iei mine meinisin mine ka rongorong me lon imwen ewe king kopwe üreni Satok me Apiatar. 36 A nom rer nöür kewe ruoman mwän Ahimas me Jonatan. Kopwe tinireto pwe repwe asileto rei meinisin mine ka rongorong.” 37 Iei mine Husai chiechien Tafit a tolong lon ewe telinimw Jerusalem lon ewe chök otun Apsalom a pwal tolong.