1 Iwe, äm aia kapong ngeniir o feil seniir. Mürin äm seseres wenewenela aia tori Kos. Sorotän ewe rän aia tori Rotes, nge seni ikenan aia sai ngeni Patara. 2 Ikenan aia küna efoch sip mi saila Fönisia, iei mine aia tötä won o fitala. 3 Iwe, aia tori eu leni ia aia tongeni küna Saipros me ie. Mürin aia saila örün ewe fanü o sai ngeni Siria. Aia tiwelong Tirus ia ra atötiu wosen ewe sip me ie. 4 Ikenan aia küna ekoch chon lükü Jesus o aia nonom rer lon ükükün eu wiik. Iwe, fän aitien Ngünmifel ngeniir ra üreni Paulus, pwe esap feila Jerusalem. 5 Nge lupwen äm fansoun nonom rer a wes, aia likitiir o sopwela äm sai. Nge ir meinisin fiti pwülüer me nöür kana ra etikeemiwu seni ewe telinimw tori ewe pi. Ikenan äm meinisin aia fotopwäsuk o iotek. 6 Mürin aia kapong ngeniir o tötä won ewe sip, nge ir ra liwiniti lenier.

7 Iwe, aia sopwela äm we sai, aia seres seni Tirus tori Ptolemais. Ikenan aia kapong ngeni ekewe chon lükü Jesus o nonom rer eu rän. 8 Sorotän ewe rän aia sai seni ikenan o tori Seserea. Ikenan aia nonom lon imwen Filip, i eman chon arongafeili ewe Pworausen Manau, pwal i eman lein ekewe füman mwän mi kefilitä me lon Jerusalem. ✡ Föf 6.5; 8.5 9 Ätei a wor föman nöün föpwül resap pwüpwülü, ra tongeni pwäri mine a monomon. 10 Mürin äm nonom ikenan ekoch rän, eman soufos itan Akapus a feito seni Jutea. ✡ Föf 11.28 11 A feito rem, a angei än Paulus pelit o föti ngeni pöün me pechen, iwe, a üra, “Iei met ewe Ngünmifel a apasa: ‘Ekewe chon Juta mi nom lon Jerusalem repwe föti ätewe mine an ei pelit lon ei lapalap, repwe pwal atolonga lepöün ekewe chon lükün Israel.’ ” 12 Lupwen aia rong ekei kapas, äm me ekewe aramas mi nom rem, aia tüngormau ngeni Paulus, pwe esap feila Jerusalem. 13 Mürin Paulus a pölüeni, “Pwota oua kechü o atai letipei? Ngang üa molotä sap ngeni chök ai üpwe föfö, nge pwal ngeni ai üpwe mäla lon Jerusalem fän iten ach Samol Jesus.” 14 Iwe, esap pitela rem, iei mine aia fanafanala. Iwe, aia üra, “Epwe fis letipen ach Samol.”

15 Mürin äm nonom ikenan ekoch fansoun, aia amolätä äm pisek o feila Jerusalem. 16 Nge ekoch me lein ekewe chon lükü Jesus me lon Seserea ra pwal etikem o emwenikeemila lon imwen eman mwän itan Mnason ia aia wasöla ie. Ätei i seni Saipros, eman chon lükü Jesus seni chök lom.

17 Iwe, lupwen aia tori Jerusalem, ekewe chon lükü Jesus ra pwapwa le etiwakem. 18 Sorotän ewe rän, Paulus a etikem le feila churi James. Iwe, ekewe souakomwen mwichefel meinisin ra pwal nom. 19 Iwe, Paulus a kapong ngeniir o apworausa ngeniir tichikin meinisin mine Kot a föri me lein ekewe chon lükün Israel ren an angang. 20 Mürin ar rongorong ngeni, ir meinisin ra mwareiti Kot. Mürin ra üreni Paulus, “Pwiim Paulus, ka küna pwe mi wor chomong ngeröün chon Juta ra lükü Jesus, nge ir meinisin ra fokun achocho le apwönüetä ekewe Allük. 21 Ir ra rong usumw, pwe ka afalafala ekewe chon Juta meinisin mi nonom lon ekewe fanüen chon lükün Israel, pwe repwe pöütala än Moses kewe allük, ka pwal üreniir pwe resap sirkomsaisi nöür semirit ika aleasochisi örünien ekewe chon Juta. 22 Met sipwe föri? Ir repwe fokun rongorong pwe ka war. 23 Iei met aia mochen pwe kopwe föri. Mi wor föman mwän mi nom ikei, ra fen föri eu pwon mwen mesen Kot. 24 Kopwe etiir o pach ngeniir lon ar angangen limelim, kopwe pwal mönätiu ewe ükükün liwin fän iten ekewe asoren limelim. Mürin repwe tongeni reipöpöla mökürer. Ren ei lapalap aramas meinisin repwe mefi pwe püsin en ka apwönüetä än Moses kewe Allük. ✡ Num 6.13-21 25 Nge ren ekewe chon lükün Israel mi lükü Jesus, aia tinala toropwe ngeniir o asile ngeniir mine sia apwüngala, pwe resap mongö ekewe mongö ra piin asor ngeni ekewe uluulun anümwäl, resap ün cha, resap ochoch fituken man mi ffor, resap pwal föri sokun lisowu.” ✡ Föf 15.29 26 Iei mine Paulus a eti ekewe mwän, nge sorotän ewe rän a fitiir le föri ewe angangen limelim. Mürin a tolong lon ewe imwenfel o asile ngeniir inet ekewe ränin limelim repwe wesila o ekewe asor repwe tongeni fis fän iten eman me eman leir.

27 Nge lupwen a arapakan ngeni pwe ekewe fisu rän repwele sopola, ekoch re Juta seni ewe fanü Asia ra küna Paulus me lon ewe imwenfel. Ra etipetipa unusen chon ewe mwich o ra turufi Paulus. 28 Ra kökkö fän leüömong, “Ämi re Israel! Oupwe alisikem! Iei i ewe mwän mi saifeil ekis meinisin o a eäni och sokun afalafal ngeni aramas meinisin mi ü ngeni ekewe aramasen Israel, än Moses kewe Allük me ei imwenfel. Nge iei a fen mwo nge uwato ekoch chon lükün Israel lon ei imwenfel o apiningaua ei leni mi pin!” 29 (Ra apasa ei pokiten ra küna Trofimus seni Efisos mi eti Paulus lon ewe telinimw, nge ra ekieki pwe Paulus a uweela lon ewe imwenfel.) ✡ Föf 20.4 30 Iwe, eu fitikoko a chöfetal lon unusen ewe telinimw o ekewe aramas ra säto seni ekis meinisin. Ra turufi Paulus o atekinawu seni lon ewe imwenfel. Mürin ra müttir öpüngala ekewe asamalapen ewe imwenfel. 31 Lupwen ra sotuni ar repwe niela Paulus, ewe pworaus a tori ewe sounemenemen sounfiun Rom, pwe unusen ewe telinimw Jerusalem a nom lon watten fitikoko. 32 Lon ewe chök otun ewe sounemenemen sounfiu a angei ekoch meilap me ekoch sounfiu o ra sätiu ren ewe mwichen aramas. Lupwen än ekewe aramas küna i fiti ekewe sounfiu, ra ükütiu le wichi Paulus. 33 Iwe, ewe sounemenem a fetal wenewen ngeni Paulus, a turufi o allük pwe repwe föti ngeni ruofoch sein. Mürin a ais, “Iö ei mwän? Nge met a föri?” 34 Iwe, ekoch me lon ewe mwich ra kökkötä won och, nge pwal ekoch won och. A fis eu watten fitikoko, pwe ewe sounemenem esap tongeni fateiti met a fis. Iei mine a allük ngeni nöün kewe sounfiu pwe repwe angei Paulus o uweetä won lenier we. 35 Ra emwenala Paulus tori ewe latö, mürin ekewe sounfiu ra eki pokiten ekewe aramas lon ewe mwichen afitikoko ra fokun song. 36 Ir meinisin ra tapweri o pupuchör, “Oupwe niela ätenan.”

37 Iwe, lupwen än ekewe sounfiu repwe le emwenala Paulus lon ewe lenien sounfiu, Paulus a kapas ngeni ewe sounemenemen sounfiu, “Kose mochen üpwe apasa och ngonuk?” Ewe sounemenem a aisini, “Ifa usun, ka silei fosun Krik? 38 Sap en ewe re Isip mi popuetä eu mwichen ü ngeni mwü o emwenawu rüanüngeröü chon ni aramas lon ewe fanüapö lon ekewe fansoun ra la?” 39 Iwe, Paulus a pölüeni, “Ngang eman re Juta, üa uputiu lon ewe telinimw Tarsus lon Silisia, ngang eman chon eu telinimw mi iteföüla. Kose mochen mwüt ngeniei ai üpwe kapas ngeni ekei aramas.” 40 Mürin ewe sounemenem a mwüt ngeni. Iei mine Paulus a ütä won ewe latö o a änipö ngeni ekewe aramas, pwe repwe fanafanala. Iwe, lupwen ra fanafanala, Paulus a popuetä le kapas ngeniir lon fosun Ipru: