1 Iwe, ewe Samol mi Lapalap a kapas ngeniei, 2 “Nöün aramas, kopwe newenewen ngeni Kok ewe samollapen Ros, Mesek me Tupal lon ewe fanü Makok, kopwe pwal osuni usun an epwe feiengau. ✡ Pwär 20.8 3 Iwe, kopwe üreni pwe iei aloi ngang Kot ewe Samol mi Lapalap: Üpwe ü ngonuk, Kok, en samollapen Ros, Mesek me Tupal. 4 Üpwe akunukoto o aköü ngächum, üpwe emwenukowu me noum mwichen sounfiu meinisin, noum oris me chon wäniir fän üfer mi ling meinisin, eu mwichemongun sounfiu fän ar tittin maun mi watte me kükün, pwal fän nöür ketilas. 5 Chon Persia, Kus me Put ra etiir fän ar tittin maun me imwer akkaw, 6 pwal ekewe mwichen sounfiu seni ewe fanü Komer me Pet Tokarma mi nom efengin fanüfan. Iwe, aramasen chomong mwü ra etuk.

7 Kopwe tümwünüöch o amolokotä, en me ewe mwicheichen sounfiu mi chufengen reöm, kopwe pwal ar souemwen. 8 Iwe, mürin chomong rän kopwe antere fän om pisekin maun. Nge lon ekewe ier repwe feito kopwe feila o maun ngeni eu fanü a ngas seni maun o ütäsefäl. Iwe, chon ei fanü ra chufengen seni chomong mwü o liwinto won ekewe chukun Israel, ra tala o pön fansoun langatam. Ekei aramas meinisin ra liwinto seni ekewe mwü o nonom fän kinamwe. 9 Iwe, en me noum kewe mwichen sounfiu meinisin, pwal ekewe mwicheichen aramasen chomong mwü oupwe töpworalong lon ewe fanü usun eu mölümöl. Oupwe usun chök eu kuchu mi pwölüela ewe fanü.”

10 Iei alon Kot ewe Samol mi Lapalap ngeni Kok, “Lon ena rän kopwe aüfarafarätä ekiekin lelukom usun angangen rawangau. 11 Iwe, kopwe apasa, ‘Üpwe töpworalong lon eu fanü esap tit, üpwe pwal maun ngeni aramas mi imweimw fän kinamwe lon ekewe telinimw esap wor tittir me asamalaper me lokkur. 12 Üpwe liapenala pisek o uwala, üpwe pwal maun ngeni ekewe leni mi tala me lom o sosefäl, pwal ngeni ekewe aramas mi chufengen seni ekewe mwü a wor nöür pwiin man me pisekir, ra pwal fanüeni ewe fanü mi nom lukalapen fanüfan.’ 13 Chon Sepa me Tetan, pwal ekewe chon amömö seni Tarsis me chon telinimwan meinisin repwe aisinuk, ‘Ifa usun, ka feito pwe kopwe liapenala pisek? Ka achufengeni noum kewe mwichen sounfiu pwe repwe soläni pisek o uwala silifer me kolt, repwe pwal liapenala pwiin man me pisek o feila fän liaper mi chomong?’

14 Iei mine, nöün aramas, kopwe osuni o üreni Kok pwe iei aloi ngang Kot ewe Samol mi Lapalap: Lon ena fansoun, lupwen nei aramasen Israel ra nonom fän kinamwe, kopwe ütä 15 o towu seni lon fanüom mi nom efengin fanüfan, en me aramasen chomong mwü, ir meinisin repwe wawa oris, eu mwichemongun sounfiu mi pwora. 16 Iwe, kopwe maun ngeni nei aramasen Israel o feitiu wor usun eu mölümöl mi tori ewe fanü. Lon kan fansoun repwe feito üpwe tinukela, Kok, pwe kopwe maun ngeni fanüei, pwe chon ekewe mwü repwe sileei, lupwen üpwe pwärala womw me fän meser pwe üa pin. 17 Iei alon Kot ewe Samol mi Lapalap: Ifa usun, sap en ätewe üa kapas usun me lom ren nei kewe chon angang ekewe soufosun Israel? Lon ena fansoun ra osuni lon chomong ier usun ai üpwe emwenuketo pwe kopwe maun ngeni Israel.”

18 Iei alon Kot ewe Samol mi Lapalap, “Lon ewe rän, lupwen Kok epwe feito o maun ngeni ewe fanü Israel, ai song epwe säsewu. 19 Pun lon ekimongun letipei, pwal lon watten ai lingeringer üa pwärätä, pwe lon ewe rän epwe fis eu chech mi fokun lapalap lon ewe fanü Israel. 20 Ekewe ikenen leset, ekewe machang, ekewe man mi watte me kükün meinisin, pwal aramasen won fanüfan meinisin repwe chechech me mwei. Chuk kana repwe turula, achau repwe mökküla, nge tit kana meinisin repwe turutiu won pwül. 21 Üpwe awarato niuokus watte won Kok ren sokopaten feiengau mi fis ngeni. Ngang Kot ewe Samol mi Lapalap üa kapas. Iteiten eman me eman epwe fiu ngeni chiechian fän nöün ketilas. 22 Iwe, üpwe apwüngü Kok ren mätter me nimanau, pwal ren üttomong me ütten fau. Üpwe apwüngätiu ekkei me primston won Kok me nöün mwichen sounfiu meinisin, pwal won ekewe mwicheichen aramasen chomong mwü mi eti. 23 Iei usun üpwe pwärala pwe üa itetekia o pin, üpwe pwal föri pwe itei epwe föüla fän mesen aramasen chomong mwü. Mürin repwe silei pwe ngang ewe Samol mi Lapalap.”