1 Iwe, lon rüe me limuen ierin ach oola, lepoputän ewe ier, lon aengolun ränin ewe aeuin maram, pwal iei ewe engol me rüanün ier mürin än Jerusalem tala, lon ewe chök ränin, üa mefi pwe ewe Samol mi Lapalap a nom rei ren an manaman. 2 Iwe, lon künaei we, Kot a uweeila lon ewe fanü Israel o anomuei won eu chuk mi fokun tekia. Ikenan üa küna me mwei och mi wewe ngeni eu telinimw. ✡ Pwär 21.10 3 Lupwen a uweeila ikenan, üa küna eman mwän, inisin a usun chök molupolupen piras. Iwe, a ütä lükün ewe asamalap o amwöchü lepöün eu selippich mi pwech, pwal efoch wokun aükük. ✡ Pwär 11.1; 21.15 4 Iwe, ewe mwän a üreniei, “Nöün aramas, kopwe nengeni ren mesom, kopwe pwal aüseling ren selingom o iseis lon letipom meinisin mine üpwe aiti ngonuk, pun iei popun Kot a emwenuketo ikei. Kopwe asile ngeni chon Israel meinisin mine kopwe küna.”

5 Iwe, üa küna ewe Imwenfel me eu tit a nom pwelin ünükün. Iwe, ewe mwän a angei an wokun aükük, ükükün langataman engol fiit, o aükü ewe tit ren. Iwe, chööchön won ewe tit ükükün engol fiit, nge tekian pwal engol fiit. ✡ 1.King 6.1-38; 2.Kron 3.1-9 6 Mürin, ewe mwän a feila ren ewe asamalap mi sape ngeni ötiu, a feito won ekewe fosso o aükü fän ewe asamalap, iwe, chööchön ükükün engol fiit. 7 A pwal aükü rumwen ekewe chon masen asamalap, langatamer me chölaper ükükün engol fiit, malülün etippen ekewe rum ükükün walu fiit, nge fän ewe asamalap lesopun kangkangan mi sape ngeni ewe Imwenfel ükükün engol fiit. 8 Mürin a aükü lon kengkangen ewe asamalap ükükün engol me rüanü fiit, 9 nge malulun etippen ewe kengkang ükükün rüanü fiit. Iwe, kengkangen ewe asamalap a sape ngeni ewe Imwenfel. 10 Lepekin ewe asamalap mi sape ngeni ötiu a wor wonu rumwen chon mas, ülüngat won epek, ülüngat won epek, nge ükükür a chök wewefengen. Iwe, ekewe etip mi nom lepekin me ruu ra pwal wewefengen. 11 Mürin, ewe mwän a aükü chölapen lon ewe asamalap ükükün rüe me ruu fiit, nge wäwän lefilen ekewe asamalap ükükün engol me wonu fiit. 12 Iwe, mwen ekewe rumwen chon mas me ruu pekin a wor eu tit tekian me malülün rüe inis, nge ekewe rumwen chon mas me rüanü pekin ükükün engol fiit. 13 Mürin a aükü chölapen kengkangen ewe asamalap seni etippen eu ekewe rumwen chon mas me lükisökürün tori etippen pwal eu mi nom awenewenan me epek. Iwe, chölapan ükükün faik me ruu fiit, eu asam a wene ngeni eu asam. 14 A pwal aükü langatamen ewe kengkang ükükün ilik me rüanü fiit, nge a itilong lon ewe leni lükün Imwenfel. 15 Iwe, seni fän mesen ewe kengkang tori lükisökürün ükükün walik me ruanü fiit. 16 A wor asammwacho mi tit ngeni mächä won etippen ekewe rumw me lükün, pwal won etippen lon. Nge won etippen lon a rup liosun ewe irä palm.

17 Mürin, ewe mwän a emwenieilong lon ewe leni lükün Imwenfel. Ikenan üa küna rum me lenien fetal seni fau ünükün ewe leni lükün Imwenfel, nge ükükün ekewe rum mi sape ngeni ewe lenien fetal ilik. 18 Ei lenien fetal a pwer ünükün ekewe asamalap, nge chölapan a usun chök langatamen ekewe asamalap. Iei ewe lenien fetal me fan. 19 Mürin a aükü ewe leni lükün Imwenfel seni lon ewe asamalap fan tori fän mesen asamalapen ewe leni mwen Imwenfel ükükün ipükü wone me walu fiit.

Mürin, ewe mwän a akomwola mwei ngeni efeng. 20 Ikenan üa küna eu asamalapen ewe leni lükün Imwenfel mi sape ngeni efeng. Iwe, a aükü langataman me chölapan. 21 Lon ei asamalap a wor ülüngat rumwen chon mas me rüepek, pwal etip mi nom lefiler me kengkangan, ükükür meinisin ra usun chök ükükün ewe aeuin asamalap. Iwe, ükükün langataman walik me rüanü fiit, nge ükükün chölapan faik me ruu fiit. 22 Iwe, asammwachon me kengkangan pwal liosun ewe irä palm mi rup ra usun chök ekewe mi nom won ewe asamalap mi sape ngeni ötiu. Iwe, a wor fisu fosso mi feitä ren ewe asamalap, nge kengkangan a sape ngeni lon. 23 Awenewenen ewe asamalap mi sape ngeni efeng a wor eu asamalap mi wenelong lon ewe leni mwen Imwenfel, a usun chök ewe asamalap mi sape ngeni ötiu. Iwe, ewe mwän a aükü lefilen ekei ruu asamalap ükükün ipükü wone me walu fiit.

24 Mürin, ewe mwän a emwenieila ngeni ör. Ikenan üa küna eu asamalap mi sape ngeni ör. Iwe, a aükü ewe asamalap, nge ükükün a usun chök ükükün ekewe lusun asamalap. 25 Iwe, won rumwen lepekin ewe asamalap me kengkangan a wor asammwacho usun chök asammwachon ekewe lusun asamalap. Iwe, langatamen kengkangan ükükün walik me rüanü fiit, nge chölapan ükükün faik me ruu fiit. 26 Iwe, a wor fisu fosso ra feitä ren ewe asamalap, nge kengkangan a sape ngeni lon. Won ekewe etip me rüepek a rup liosun ewe irä palm. 27 Mi pwal wor eu asamalapen ewe leni mwen Imwenfel mi sape ngeni ör. Iwe, ewe mwän a aükü seni ei asamalap tori pwal ewe eu asamalapen ewe leni lükün mi sape ngeni ör ükükün ipükü wone me walu fiit.

28 Mürin, ewe mwän a emwenieila ren ewe asamalap mi sape ngeni ör o emwenieilong lon ewe leni mwen Imwenfel. Iwe, a aükü ei asamalap, nge ükükün a usun chök ekewe lusun. 29 Iwe, ükükün ekewe rumwen chon mas, pwal ükükün etippan me kengkangan ra usun chök ükükün ekewe lusun. Nge a wor asammwacho pwelin ünükün ewe kengkang me ewe lenien tolong. Iwe, langatamen kengkangan ükükün walik me rüanü fiit, nge chölapan ükükün faik me ruu fiit. 30 (Mi wor kengkang ünükün ewe leni mwen Imwenfel ükükün langatamer faik me ruu fiit, nge ükükün chölaper walu fiit.) 31 Iwe, kengkangen ewe asamalap a sape ngeni ewe leni lükün Imwenfel. Ekewe etip a rup liosun ewe irä palm wor, nge a wor walu fosso mi feitä ren ewe asamalap.

32 Mürin, ewe mwän a emwenieila ren ewe asamalap mi sape ngeni ötiu o emwenieilong lon ewe leni mwen Imwenfel. Iwe, a aükü ewe asamalap, nge ükükün a usun chök ekewe lusun. 33 Iwe, ükükün ekewe rumwen chon mas, pwal ükükün etippan me kengkangan ra usun chök ekewe lusun. Nge a wor asammwacho pwelin ünükün ewe kengkang me ewe lenien tolong. Langatamen kengkangan ükükün walik me rüanü fiit, nge chölapan ükükün faik me ruu fiit. 34 Iwe, kengkangen ewe asamalap a sape ngeni ewe leni lükün Imwenfel. Won ekewe etip me rüepek a rup liosun ewe irä palm, nge a wor walu fosso mi feitä ren ewe asamalap.

35 Mürin, ewe mwän a emwenieila ren ewe asamalap mi sape ngeni efeng. Iwe, a aükü ewe asamalap, nge ükükün a usun chök ekewe lusun. 36 Iwe, ekewe rumwen chon mas, pwal etippan me kengkangan ra usun chök ekewe lusun. Nge a wor asammwacho pwelin ünükün ewe kengkang me ewe lenien tolong. Langatamen kengkangan walik me rüanü fiit, nge chölapan faik me ruu fiit. 37 Iwe, kengkangen ewe asamalap a sape ngeni ewe leni lükün Imwenfel. Won ekewe etip me rüepek a rup liosun ewe irä palm, nge a wor walu fosso, ra feitä ren ewe asamalap.

38 A wor eu rum fiti eu asamalap ren ewe kengkang lon iteiten eu me eu kewe asamalapen lon. Ikenan ra talü ekewe mönün asoren kek. 39 Nge lon kengkangen ewe asamalap a wor akaruu chepel me rüepek, ia ra niela ie ekewe mönün asoren kek me mönün asoren amusamusen tipis, pwal mönün asoren amusamusen pupungau. 40 Iwe, lükün etippen kengkangen ewe asamalap mi sape ngeni efeng arun ewe latö a wor rüanü chepel, ruu won epek, pwal ruu won epek. 41 Iei usun a wor rüanü chepel lon ewe kengkang, pwal rüanü lükün, pwe ükükün ekewe chepel meinisin walu, ia ekewe mönün asor ra ninnila ie. 42 Iwe, a pwal wor rüanü chepel ra för seni fau mi fal fän iten mönün asoren kek. Iwe, ükükün langatamer me chölaper ilik inis, nge tekiar rüe inis. Won ekewe chepel iei lenien iseis pisekin niela ekewe mönün asoren kek me ekewe lusun sokun asor. 43 Won aamen ekewe chepel a wor eu tit mi päilong won, tekian ükükün ülüngat inis. Nge won ekewe chepel ra iseis ewe fituk fän iten asor.

44 Mürin, ewe mwän a emwenieilong lon ewe leni mwen Imwenfel. Ikenan a wor ruu rum. Eu a nom lükün ewe asamalap mi nom peliefeng o sape ngeni ör, nge eu a nom lükün ewe asamalap mi nom peliör o sape ngeni efeng. 45 Iwe, ewe mwän a üreniei, “Ei rum mi sape ngeni ör rumwen ekewe souasor mi wisen föri angangen lon Imwenfel, 46 nge ewe rum mi sape ngeni efeng rumwen ekewe souasor mi wisen föri angangen ewe rongen asor. Ätekei ir nöün Satok, pun ir chök me lein ekewe mwirimwirin Lefi ra tongeni feito fän mesen ewe Samol mi Lapalap, pwe repwe angang ngeni.” 47 Iwe, ewe mwän a aükü ewe leni mwen Imwenfel ükükün langataman me chölapan ipükü wone me walu fiit. Nge fän mesen ewe Imwenfel a wor ewe rongen asor.

48 Mürin, ewe mwän a emwenieila ren kengkangen ewe Imwenfel. A aükü ewe lenien tolong ükükün walu fiit. Iwe, chölapen lon ewe asamalap ükükün rüe me rüanü fiit, nge etippen lepekin me ruu ükükün limu fiit malulun. 49 Iwe, langatamen ewe kengkang ükükün ilik me rüanü fiit, chölapan rüe fiit, nge a wor engol fosso ra feitä ren. Lon ewe asamalap a pwal wor ürelap, efoch won epek, pwal efoch won epek.