1 Nengeni, ewe Samol, ewe Samol mi Unusen Manaman epwe angei seni Jerusalem me Juta aramas me mettoch meinisin ra eäniir longolong. Epwe angei seniir ener mongö me ünümer koluk. 2 Epwe angei seniir ekewe ätepwora me sounfiu, ekewe souapwüng me soufos, ekewe soupwe me souakom, 3 ekewe samolun sounfiu me souemwen mi iteüöch, ekewe souekiek pwal ekewe sourong me souawarawar. 4 Iwe, ewe Samol mi Lapalap epwe awisa ät pwe repwe ar samol, nge semirit repwe nemeniir. 5 Iwe, aramas repwe kirikiringaufengen lefiler eman ngeni eman. Säräfö resap suföliti chinlap, nge chokewe esap wor iter repwe pälüeni ekewe mi iteföüla.

6 Epwe war eu fansoun, lupwen chon eu eterekes repwe üreni eman me leir, “Kopwe ach samol, pun a chüen wor üfom owokot. Kopwe nemeni mwüch mi fitikoko.” 7 Mürin epwe pälüeni, “Üsap tongeni alisikemi, pun ese wor enei me üfei lon imwei. Ousap seikieitä pwe üpwe samolun aramas.” 8 Iwe, Jerusalem a fetal ngeni an epwe feiengau, nge Juta epwe turula, pun chor ra pälüeni ewe Samol mi Lapalap ren ar kapas me ar föför, ra pwal ü ngeni ewe Kot mi ling. 9 Wowon won meser a pwärätä ar lapalapangau, ra tipis usun chon Sotom, nge resap aopala. Feiengauer! Pun ra püsin atoto feiengau wor. 10 Oupwe asile ngeni chon pwüng pwe repwe feiöch, pun repwe feiöchüni feiöchün ar föför. 11 Feiengauen ekewe chon föföringau! Repwe püsin küna feiengauer, pun mine ra föri epwe püsin sapeitiir. 12 Ät ra ariaföüü nei aramas, nge fefin ra nemeniir. Ämi nei aramas, nöümi souemwen ra emweningauekemi o atokakemiila seni ämi al.

13 Ewe Samol mi Lapalap a mot won an lenien apwüng pwe epwe atipisi nöün kewe aramas, a ütä pwe epwe apwüngüür. 14 Ewe Samol mi Lapalap epwe apwüngü ekewe souakom me souemwenin nöün aramas. A atipisiir o apasa, “Ämi chokewe oua arosala ewe tanipin wain, imwemi ra ur ren pisek oua angei seni ekewe chon wöüngau. 15 Pwota chök oua puri nei aramas o angei ämi feiöch seni ekewe chon wöüngau? Ngang Kot ewe Samol mi Unusen Manaman üa kapas.”

16 Ewe Samol mi Lapalap a pwal apasa, “Ekewe fin Jerusalem ra lamalamtekia, ra sikesik le fetal, ra nerikirik ren ar mochenia, ra pwal lüölü lupwen ar fetal, pwe fouten pecher repwe tikitik. 17 Iei mine üpwe orupu mökürer pwe meten mökürer repwe mworola, pwe repwe mongopan.”

18 Lon ena fansoun ewe Samol epwe angei seni ekewe fin Jerusalem ar kewe fouten peche pwal fouten mökür me fän ü. 19 Epwe angei seniir niouter me ar lälä pwal pwölüpwölün won meser, 20 mwärämwärin won mökürer me lälän pecher, pwal chomong sokun rumen epit me omunger, 21 nöür kewe ringen won pau pwal ringen lon pwöt, 22 chomong sokun üfer üföüfen mwichelap pwal ar pwotou, 23 nöür kilasen ori me üfer simis mi menenen o lingöch, pwal imwer akkaw me ar nikotupwöl meinisin. 24 Iwe, epwe fis pwe ar pwokus ren lö epwe siwil ngeni pwongau, nge siwilin ar pelit repwe aea säl. Iwe, mökürer mi langatam epwe mwor pwe repwe mongopan, resap üföüf üf mi lingöch, nge repwe üföüf üf seni tuk, nge chokewe mi liöch repwe liengau. 25 Ekewe mwän seni ewe telinimw, pwal fokun ekewe chon pwora repwe mäla lon maun. 26 Iwe, epwe wor kechü me ngüngüres lon ekewe asamalapen Jerusalem, pun ewe telinimw a fokun tala, nge aramasen lon resap chüen nom.