1 Iei alon ewe Samol mi Lapalap ngeni Sirus nöün we mi kepit,

a pwal awisa pwe epwe akufu ekewe mwü mi nonom mwan

o akisikisätiu nemenemen ekewe king,

epwe pwal suki asamen ekewe telinimw mi nom mwan pwe resap chüen kapüngüla,

2 “Üpwe akom mwom o atekisonätiu chuk kana.

Üpwe ataetiu ekewe asam piras

o atatakisi lokkur.

3 Üpwe fang ngonuk wöü mi iseis lon rochopwak,

pwal pisek mi aüchea mi nom lon leni mi monomon,

pwe kopwe silei pwe ngang ewe Samol mi Lapalap ewe Koten Israel,

ewe a köri ngonuk itom.

4 Fän iten nei chon angang Israel,

nei we üa afili,

üa köri ngonuk itom,

üa pwal aita ngonuk eu it mi iteüöch,

inamwo are kosap sileei.

5 Ngang ewe Samol mi Lapalap, esap wor eman lüki,

esap pwal wor eman Kot lüki.

Üpwe atufichuk, inamwo are kosap sileei.

6 Üa föri ei

pwe aramas seni ötiu tori lotou repwe mefi

o silei pwe esap fokun wor eman Kot lüki.

Ngang ewe Samol mi Lapalap, esap wor eman lüki.

7 Ngang üa förätä saram, üa pwal förätä rochopwak.

Ngang üa awarato feiöch me feiengau.

Ngang ewe Samol mi Lapalap, üa föri ekei mettoch meinisin.”

8 “Ämi läng me ämi kuchu kana, oupwe apüngätiu pwüng,

nge fanüfan epwe sukula,

pwe manau me pwüng repwe pwükütä o märfengen.

Ngang ewe Samol mi Lapalap üa föri ei.

9 Feiengauen eman a anini ngeni ewe chon föri.

Ifa usun, eu sepi seni pwül epwe anini ngeni ewe mi föri?

Ifa usun, ewe pwül epwe aisini ewe mi angang won, ‘Met ka föri?’

Ifa usun, epwe apasa, ‘Föriom sepi esap lapalapöch?’ ✡ Rom 9.20

10 Feiengauen eman a aisini saman me inan,

‘Pwota oua afisiei lon ei sokun lapalap?’ ”

11 Iei alon ewe Samol mi Lapalap, Ewe mi Pin lon Israel,

pwal ewe mi föri Israel,

“Ifa usun, oua esitaei won mine epwe fis

ngeni nei kewe lon kan fansoun repwe feito,

ika oua allük ngeniei usun mine üpwe föri?

12 Ngang üa föri fanüfan,

üa pwal föri aramasen won.

Iwe, ren ai manaman üa ameresala läng,

üa pwal nemeni akkar, maram me fü kana.

13 Ngang üa köri Sirus fän pwüng,

üpwe pwal awenechara an al kana meinisin.

Iwe, epwe aüetä ai telinimw Jerusalem

o angasa nei chon oola,

nge üsap ngeni och liwinin ika lifangen amichimich.”

Iei alon ewe Samol mi Unusen Manaman.

“Wöün Isip me pisekin Itiopia repwe om,

nge ekewe chon Sepa mi mwänöch repwe feito reöm pwe kopwe nöüniir amanau.

Iwe, repwe tapwela murum fän fööföör selimächä o chapetiu mwom.

Repwe tütüngor ngonuk o apasa,

‘Ellet Kot a etuk, esap fokun wor eman Kot lükün.’ ”

15 Ellet, en eman Kot mi monomon,

en Koten Israel, ewe Chon Amanau.

16 Ir meinisin mi ü ngonuk repwe küna säw o itengau,

nge chokewe mi falei uluulun anümwäl repwe lichipüng.

17 Nge chon Israel ra küna manau esemüch ren ewe Samol mi Lapalap.

Resap küna säw are itengau tori feilfeilachök.

18 Iwe, ewe Samol mi Lapalap a föri läng,

i ewe Kot a pwal föri fanüfan

o anüküchara.

Esap föri pwe epwe kotongau,

nge a föri pwe lenien aramas.

Iwe, a apasa, “Ngang ewe Samol mi Lapalap,

esap wor eman Kot lüki.

19 Üsap fos lemonomon

are lon eu leni mi rochopwak.

Üsap apasa ngeni ekewe mwirimwirin Jakop

pwe repwe resin küttaei, nge resap künaei.

Ngang ewe Samol mi Lapalap, üa apasa mine a let,

üa pwärätä mine a pwüng.”

“Oupwe feito o mwichefengen, oupwe arapeto,

ämi mi chüen manau me lein chon ekewe mwü.

Esap wor miritin chokewe ra feilfetal

fän ar uluulun anümwäl mi fal

o ikiotek ngeni eman kot esap tongeni amanaueer.

21 Oupwe feito o fos.

Aramas repwe pwüngüpwüng lefiler.

Iö a apworausa ei lon ewe fansoun a la? Iö a pwärätä ei me lomlom?

Ifa usun, sap ngang, ewe Samol mi Lapalap?

Esap wor eman Kot lüki,

esap wor eman Kot mi pwüng are eman Chon Amanau,

esap fokun wor eman lüki.

22 Oupwe kulitiei, ämi aramasen fanüfan meinisin,

pwe oupwe küna manau.

Pun ngang Kot, esap pwal wor eman lüki.

23 Iwe, üa püsin akapelüei, nge kapasen awei a let, esap pwal siwil,

‘Aramas meinisin repwe feito o fotopwäsuk ngeniei,

nge ir meinisin repwe pwon fän akapel,

pwe repwe allükülük ngeniei.’ ✡ Rom 14.11; Filip 2.10-11

24 Iwe, repwe apasa usi, ‘Ren ewe Samol mi Lapalap chök

a wor pwüng me pöchökül.’

Iwe, chokewe meinisin mi pälüeni Kot fän song repwe feito ren o küna säw.

25 Nge ren ewe Samol mi Lapalap ekewe mwirimwirin Israel meinisin repwe küna pwüng,

repwe pwal mwänek.”