1 Iwe, Ngünün Kot ewe Samol mi Lapalap a nonom woi,

pun a awisaei pwe üpwe aronga ngeni chon mwelele pworausen manau.

A tinieito pwe üpwe achipa chon luketatakis,

üpwe asile ngeni chon oola ar repwe ngasala,

pwal ngeni chon fötek pwe epwe suk lenien ar fötek. ✡ Mat 11.5; Luk 7.22

2 A tinieito, pwe üpwe aronga ngeni nöün aramas

pwe ewe ierin än ewe Samol mi Lapalap chen a war,

pwal ewe ränin än Kot apwüngü chon oputer.

Iwe üpwe achipa meinisin mi letipeta lon Sion. ✡ Luk 4.18-19; Mat 5.4

3 Üpwe ngeni chokewe mi letipeta lon Sion

epa mwärämwär siwilin falangen won mökürer,

pwapwa siwilin kechü, pwal kölün mwareiti siwilin letipeta.

Iwe, repwe wewe ngeni irä ewe Samol mi Lapalap a püsin fotuki,

repwe föri mine a pwüng pwe Kot epwe küna ling ren.

4 Iwe, repwe aüsefälietä ekewe tit mi tala me lomlom,

repwe försefäli ekewe leni mi tatakis fansoun langatam,

pwal telinimwen ekewe täppin aramasen lom.

5 Iwe, chon ekis repwe foleni nöümi pwiin man,

wasöla repwe pwal nöümi chon tuw pwül

me chon angang ngeni ämi tanipin wain.

6 Nge ämi oupwe iteni nöün ewe Samol mi Lapalap souasor,

pwal nöün ach we Kot chon angang.

Iwe, oupwe manau seni wöün mwü kana,

oupwe pwal pisekini pisekir o küna ling ren.

7 Pokiten ämi oua küna turunufas me itengau fän ruu,

iei mine oupwe pwal angei fän ruu wisemi me lon püsin fanüemi,

nge pwapwa esemüch epwe nom remi.

“Ngang üa efich pwüng, nge üa oput solä me föföringau.

Üpwe ngeni nei aramas liwinir fän allükülük,

üpwe pwal föri ngeniir eu pwon esemüch.

9 Iwe, mwirimwirir repwe sil me lein chon ekewe mwü,

nge nöür repwe iteüöch me lein ekewe ainang won fanüfan.

Chokewe meinisin mi küneer repwe silei

pwe ir eu mwichen aramas ngang üa afeiöchüür.”

10 Üpwe fokun pwapwa ren ewe Samol mi Lapalap, ngüni epwe mwänek ren ai Kot.

Pun a aüföüfa ngeniei manau, a pwal pwilitalong woi pwüng pwe ina üfei.

Üa wewe ngeni eman mwän apwüpwülü söfö, a foutei ngeni foutan,

üa pwal wewe ngeni eman fin apwüpwülü söfö, a mwärämwär mwärin fau aüchea. ✡ Pwär 21.2

11 Pun usun irä ra pwükütä won fanüfan,

pwal usun irä mi fot lon tanipi ra märitä,

iei usun Kot ewe Samol mi Lapalap epwe apwükü pwüng

me kapasen ingemwar fän mesen chon ekewe mwü meinisin.