63
Ewe rän Kot epwe ngeni aramas chappen ar föför
63.1-6
1 “Iö ätewe a feito me Etom seni ewe telinimw Posra fän üfan mi tiketikepar? Iö ätewe a fokun lingöch fän üfan o fetal lon an pwora me pöchökül mi lapalap?” ✡ Ais 34.5-17; Jer 49.7-22; Is 25.12-14; 35.1-15; Am 1.11-12; Op 1-14; Mal 1.2-5
“Ngang ewe Samol mi Lapalap üa kapas fän pwüng, üa tufichin amanaua aramas.” 2 “Pwota ufom ra parapar usun chök üfen eman mi puri föün irän wain?”
3 “Ngang chök üa puri chon ekewe mwü usun föün irän wain, nge esap wor eman a etiei. Üa puriretiu fän ai chou me song. Iwe, üfei meinisin ra tärässük ren char, pwe ra fokun limengau. ✡ Pwär 14.20; 19.15; 19.13 4 Pun üa ekieki lon letipei pwe ewe fansoun ai üpwe amanaua nei aramas a war, pwal ewe fansoun ai üpwe ngeni chon oputer chappen ar föför. 5 Iwe, üa nenefeil, nge esap wor eman a alisiei, üa pwal weitifengeniei pwe esap wor eman a atufichiei. Iei mine püsin pei a awinnaei, nge ai song a atufichiei. ✡ Ais 59.16 6 Üa purätiu chon ekewe mwü fän ai song, üa pwal apucheer ren ai lingeringer o föri pwe char a suputiu lepwül.”
Kot a kirikiröch ngeni Israel
63.7-14
7 Iwe, üpwe apworausa usun än ewe Samol mi Lapalap tong me ümöümöch,
üpwe mwareiti an föför ngenikich,
üpwe pwal pworaus usun an kirikiröch mi lapalap a eäni ngeni chon Israel
lon an tong me ümöümöch mi somwola.
8 Ewe Samol mi Lapalap a apasa, “Ellet ir wesewesen nei aramas, resap eäni föförün atuputup ngeniei.” Iwe, Kot a amanaueer seni ar riaföü meinisin. 9 Püsin i a amanaueer, sap eman chon läng. Ren an chen me tong ngeniir a angaseer, a ekiretä o mwäreer lon ekewe fansoun lom.
10 Nge ir ra chök ü ngeni Kot o achouala Ngünün mi pin. Iei mine a wiliti eman chon oputer, a pwal püsin fiu ngeniir. 11 Mürin nöün aramas ra chechemeni ewe fansoun lom, ekewe ränin manauen Moses nöün Kot we chon angang. Iwe, ra ais, “Ia a nom ie ewe Samol mi Lapalap, a emwenawu ekewe chon masen nöün mwichen aramas me lon ewe matau? Ia a nom ie ewe Kot a tinato Ngünün mi pin pwe epwe nonom lein nöün aramas, 12 ewe Kot mi atufichi Moses ren an manaman mi amwarar o kinifeseni ewe matau me mwer, pwe itan epwe ling ren tori feilfeilachök, ✡ Eks 14.21 13 a pwal emwenirewu, lupwen ra fetal epin ewe matau? Resap chepetek usun eman oris esap chepetek lon fanüapö. 14 Iwe, Ngünün ewe Samol mi Lapalap a asösöör, usun eu pwiin kow a feitiu lon eu lemol pwe epwe asösö. Iei usun a emweni nöün aramas pwe itan epwe ling ren.”
Iotekin tüngor ümöümöch me alilis
63.15-64.12
15 Äm Samol mi Lapalap, kopwe netiu me läng seni leniom mi pin o ling. Ia a nom ie om tiliken me om manaman? Tipepweteten letipom me om tong resap chüen torikem. 16 Nge en Semelapem, inamwo are Apraham esap silekem, ika Jakop esap ekieki usum. Äm Samol mi Lapalap, en semelapem, en äm Chon Amanau, iei itom seni chök lomlom. 17 Äm Samol mi Lapalap, pwota ka mwüt ngenikem pwe aia tok seni om al kana, pwota ka atipeföreakem pwe aisap chüen niueituk? Kopwe liwinto fän iten noum kewe chon angang, ekewe ainang ka ainangeniir. 18 Äm noum aramas mi pin aia imweni imwom mi pin fansoun mochomoch chök, nge iei ekewe chon oputakem ra purätiu imwom. 19 Aia wiliti eu mwichen aramas ra usun chök chokana kosamwo nemeniir seni me lom, ika usun chök chokana resap iteni noum.