1 Mürin, Elihu a apasa,

2 “Oupwe aüselinga ai kewe kapas, ämi mwän mi tipachem,

oupwe aü selingemi ngeniei, ämi chon silelap.

3 Pun selingach a sotuni kapas usun chönawach a neni mongö.

4 Ousipwe filätä mine a pwüng.

Ousipwe kaiöfengen mine a mürina.

5 Pun Hiop a apasa, ‘Esap wor ai tipis,

nge Kot a angei seniei ai pwüng.

6 Ikamwo üa pwüng, nge üa nom lon tettelin chon chofana.

Ikamwo üsap pupungau, nge kinasei esap chüen tongeni mo.’

7 Meni aramas a usun chök Hiop mi ünümätä kapasen ämängau usun chök koluk,

8 mi eti ewe mwichen chon föföringau

o chiechi ngeni ekewe aramas mi ingau?

9 Pun Hiop a apasa, ‘Esap wor feiöchün eman aramas,

are a föri letipen Kot.’

10 Iei mine ämi mwän mi weweöch, oupwe aüselingaei.

Ese fokun tufich ngeni Kot pwe epwe föri föför mi ngau,

ese fokun tufich ngeni Ewe mi Unusen Manaman pwe epwe föri mine a mwäl.

11 Pun Kot epwe ukun ngeni eman me eman aramas ükükün an föför,

epwe liwini ngeni won ükükün lapalapen manauan.

12 Ellet, Kot esap föri och föför mi ngau,

Ewe mi Unusen Manaman esap atoka mine a pwüng. ✡ Kölf 62.12

13 Iö a filätä Kot pwe epwe nemeni fanüfan?

Iö a awisa pwe epwe tümwünü unusen fanüfan?

14 Are Kot epwe chök angeesefäli ngünün ika ngasangasan,

15 mönümanau meinisin repwe mäla o liwiniti pwül.

16 Are mi wor om mirit, Hiop, kopwe aüselingaei,

kopwe rongorong ngeni mine üpwe apasa.

17 Ifa usun, eman mi oput pwüng epwe nemenem?

Ifa usun, kopwe atipisi Kot ewe mi pwüng me manaman?

18 I ewe mi apasa ngeni eman king, ‘Ka lomotongau,’

ika ngeni ekewe aramas tekia, ‘Oua aramasangau.’

19 Esap lifilifil ngeni samol,

esap pwal aücheani ekewe chon wöümong lap seni ekewe chon wöüngau,

pun a föriir meinisin.

20 Lon eu chök otun aramas ra mäla lukenipwin.

Ekewe aramas ra chechech o mäla.

Pöün Kot a angeala ekewe chon pwora,

nge sap pöün eman aramas.

21 Mesen Kot a afota alen ekewe aramas,

a nengeni fefetalin pecher.

22 Esap wor eu leni mi kiroch ika rochokich

ia ekewe aramasangau ra tongeni aopeer ie.

23 Kot esap afata eu fansoun inet aramas repwe feito fän mesan

pwe epwe eäni kapwüng ngeniir.

24 A asapwilätiu ekewe mi nemenem,

nge esap osun an epwe akomwen atikinöör,

mürin a atolonga ekoch lon lenier.

25 Pokiten a silei ar föför,

a atururetiu o atatakisiir lepwin.

26 A apwüngüür me fän mesen aramas meinisin pokiten ar föföringau,

27 pun ra kul seni ar tapwela mürin,

nge resap afäli an kewe allük.

28 Ir popun pwe ekewe chon wöüngau ra kökköri Kot pwe epwe alisiir,

nge i a rongorong ar siö.

29 Are Kot a fanafanala, iö epwe tongeni apwüngü?

Are i a amona mesan, iö epwe tongeni küna?

Nge Kot a nemeni eman aramas usun chök an nemeni chon eu mwü,

30 pwe esap mwüt ngeni ätewe esap aleasochis ngeni epwe nemenem

o atupu ekewe aramas.

31 A mürina än eman aramas epwe pwäri ngeni Kot,

‘Üa tipis, üsap chüen föri och mi mwäl.

32 Kopwe aiti ngeniei mine üsap küna.

Are üa föföringau, üsap chüen förisefäli.’

33 Are en Hiop kosap mochen ekieksefäl,

pwota Kot epwe liwini ngonuk usun en ka mochen?

En kopwe püsin pälüeni ei kapas ais, nge sap ngang.

Iei mine kopwe pwärätä met mefiom.

34 Aramas mi mirit repwe tipeeu ngeniei,

nge chokewe mi tipachem repwe üreniei,

lupwen ra rongorong ai kapas,

35 ‘Än Hiop kapas esap wor silelap lon,

mine a apasa esap wor mirit lon.’

36 Amwo Hiop epwe fokun küna sosot me ren aramas,

pun an kapas a usun chök än ekewe aramasangau kapas.

37 A apacha an ü ngeni Kot ngeni an tipis.

A alopolop fän ämängau me leich

o achomonga an kapasen ü ngeni Kot.”